وأخيرا قدرت أحقق هدف من أهدافي أنني قدرت أعمل استوديو جيمنج و سيت اب قوي. وقررت بدل ما أنا هشارك كيفية عمل الاستوديو بتاعي فقط، لا، هعرفكم كيفية عمل الاستوديو بتاعكم والقواعد والحاجات اللي أنتم تمشوا عليها، ربما حد يبحث وهكذا ويستفيد. وطبعًا الكلام ده من اللي أنا اتعلمته ومن وجهة نظري.

كيفيه عمل استوديو جيمينج من الصفر

طبعًا أنا نقلت لشقة جديدة عشان أقدر أعمل الاستوديو ده. وأول خطوة عملتها أنني قررت أي غرفة هتكون الاستوديو بالظبط. عندي نظام للشقة هي فاتحة على شارع عمومي وشارع جانبي، لذلك خليت الغرفة اللي هي تبع الاستوديو تكون على الشارع الجانبي علشان موضوع الصوت والإزعاج والعربيات والكلام ده، والغرفة الثانية بقى اخترتها أنها تكون غرفة النوم. بعد كده بدأت أشوف التشطيب بتاع الغرفة، هل هو كويس ولا لا، والدهان بتاعها مظبوط ولا لا، وهل محتاج يتغير، وكل الكلام ده. وهنا في الغرفة بتاعتي لاحظت أن الدهان ما كانش فيه أي مشاكل والتشطيب كان كويس، لذلك قررت أنني مش هغير الدهان، وخصوصًا كمان أن اللون بتاعها يعني قريب من اللون اللي كان في دماغي، فمش محتاج أنني أكلف نفسي وأنني أغيره. يعني كده أول مهمة عندنا تمت وهي مهمة دهان الحوائط.

كيفيه التخلص من صدي الصوت في الاستوديو

ثاني خطوة عندنا وهي الأرضية، المفروض بتحط سجاد أو موكيت أو بديل خشب في الأرض علشان ده هيساعدك أنك تقلل صدى الصوت شوية. أنا هنا اخترت أنني أفرش الأرضية بالكامل بالموكيت وبدأت أنا وإخواتي شهاب ومحمد في قص وتركيب المكيت. بعدين قررت ان الحيطة اللي على الشارع الجانبي املاها بالفوم اللي هو عازل للصوت، عشان يعزل أي صوت جاي من الخارج. هو مش هيعزل، هو هيحاول يقلله شوية، لأن عدو صانع المحتوى صدى الصوت والإزعاج اللي بيجي من الشارع وهكذا. طبعًا اخترت اللون بتاع الفوم يكون أسود، عشان يدي شكل مع اللون اللي هو تبع الحيطة الأوف وايت أو الأبيض.

اختيار اساس الاستوديو

ثالث خطوه عنددنا وهي المكتب، وده من أهم الحاجات اللي لازم تركز فيها، لأن الموضوع مش أي مكتب وخلاص. لازم تختار المكتب على حسب تصميم الغرفة وعلى حسب هتستخدمه إزاي وإيه اللي هيتحط عليه وهكذا. في حالتي أنا اخترت المكتب يكون على شكل حرف L، عشان أحط عليه الشاشة والكيسة واللاب توب بتاعي. حبيت أن يكون عندي جزئين، يعني جزء للكيسة والشاشة وجزء للاب توب ده منفصل عن ده. طلبت المكتب ووصلي وبدأت أنا وإخواتي نركب المكتب لحد ما خلصناه.

تجهيز سيت اب

أول حاجة طبعًا طلبت الشاشة، وهنا اخترتها تكون شاشة كيرف 32 بوصة 165 هيرتز بدقة 2k، واختارت الماركة بتاعتها تكون سامسونج. اخترتها 32 بوصة علشان تفيدني في المونتاج شاشة كبيرة، وما اخترتهاش تكون أكبر من كده علشان موضوع الجيمينج والألعاب، بحيث اني مجبش شاشة كبيرة خالص فأقعد أبص يمين شمال ولا الوح رقبتي عشان أشوف الجيم وهكذا. فلازم توزع ما بين احتياجاتك يا أسطورة، أو تشوف احتياجاتك وتبدأ تختار شاشة على حسب احتياجاتك. ثاني حاجة عندنا وهي تجهيز الكيسة. طبعًا يا صديقي كنت شاري كيسة زمان، كنت شاري كيسة قوية وغالية في وقتها، بس كنت جايب معالج APU اللي هو معالج وكارت شاشة في نفس الوقت، جبت يا أساطير معالج Ryzen 5 5600X مع كارت شاشة RTX 3060 12 جيجا في vram. بعد كده اشتريت بقى يا أساطير اتنين ماوس، ماوس للكمبيوتر سلكي من لوجيتك G502، وماوس وايرلس للاب توب بتاعي من Redragon M910K. واشتريت كمان كيبورد من Redragon K569 RGB ومع ماوس باد جديدة. وأخيرًا يا أساطير اشتريت سماعة جيمنج من HyperX Cloud 2، والصراحة ما استرخصتش في السماعة عشان دايمًا هكون يعني لابسها وهكذا، فلازم ما تضرش على السمع، يعني تكون مريحة وهكذا. أنا عندي كرسي طبي، مرضيتش أشتري كرسي جيمنج، عشان أنا هقعد عليه فترات طويلة، فده هيتعب ضهري لو جبت الكرسي الجيمنج، هو شكله حلو بس هيتعب ضهري. فلذلك يا أسطورة، أنت دايمًا في السيت أب بتاعك لازم تختار الحاجة اللي هتريحك، مش الحاجة اللي شكلها حلو. وتحاول توازن يعني الحاجة اللي تريحك وتكون شكلها مقبول شوية ومظبوط معاك، كده أنت تكسب الراحة وتكسب الشكل.

عمل ديكور واضاءات الغرفه

نيجي لآخر حاجة عندنا يا أساطير، وأهم حاجة بقى ديكور الغرفة والإضاءات والحركات دي. ودي من أصعب الحاجات، لأن الفينش بتاعها لو جه كويس الغرفة بقت في مكان تاني، اخترت LED Neon، حبيت أنني ألف الغرفة بتاعتي بالـ LED Neon ده حوالين الأرض من تحت، وما اخترتهوش يكون قوي جدًا، بحيث أنه هو هيتحط على الأرض، فمش هيبان، هو بس الديكور الغرفة. بس اخترت نوعيته تكون كويسة، وبدأت أنني ألف حوالين الغرفة، وجبت LED Neon تاني حطيته حوالين المكتب بتاعي. بالنسبة للديكور، بدأت أنني أجيب أباليك، وأنا بحب شوية الأباليك الكلاسيك والأباليك المودرن ومحبتش الغرفة تكون كلها جيمنج قوي، لأن أنا ناوي بإذن الله أعمل بث مباشر على الإنستجرام وكده، فحبيت أن يكون فيه حاجات هادية وفيه حاجات كلاسيك، وجبت كمان يا أساطير بعض الأرفف، بحيث ان انا أضع عليها فيجرات والحاجات اللي تبع الديكور اللي متعارف عليها دي. فبدأت ان انا أجيب شوية تابلوهات طلبتها مخصوص، حاجة بريميوم يعني، وبدأت ان انا أجيب فيجرات وبدأت أجيب حاجات الجيمينج، تابلوهات برضو، حاجات خشب تتعلق على الحيطة.